Coragem irmon, é si quês flâ’m,

ba pa ‘strangêro vivê bo vida,

aventura ‘m tem na sangue,

coragem ca ta faltâ’m.

Li na ‘strangêro

ês montâ’m, ês pô’m barbitcho,

Destruí’m nhas fantasias,

fazê’m cêga co dinhêro.

Bendê’m nha sangue,

ês chinâ’m flâ quel quê torto,

ês dâ’m padja, ês bacinâ’m,

bico quente ês pô’m na môn.

Nhôs cu nhôs nhôs djuntâ mom,

nhôs falâ, nhôs culbitâ,

gato ‘scaldado na lume

tem medo di água quente.

Nhôs tirâ, nhôs pô mas tcheu,

nhôs temprâ, nhôs cozinhâ,

bistí saia di ‘scocês,

paladar di marciano.

Lebâ’m nha terra,

ca bo dexâ’m na ‘strangêro,

nem co Guilda nem co Dollar

djâ’m ‘stâ farto di riola.

Adeus nhas guêntis,

camaradas e patrícios,

quêl groguinha é quê di meu,

bico fino é só pa nhôs.