Ês ninob c’um melodia suave e doce

Moda um tchoro moda um lamento

D’um sofrimento profundo

Herança de nha povo

Mi ê tristeza d’um cretcheu perdido

D’um sodade dorido

Sofrimento d’um partida

Alegria na regresso

Mim ê um amor profundo

Consolo pa tudo momento

Pa companham ês fazeme poesia mas bnite

Nhô Eugénio intchim q’sê romance

B.Leza tocame q’melodias d’sê Bronze

E Claridade bem iluminam nha alma

Ês embalame na cordas de violão, violino, cavaquim

D’boche d’um janela,

D’um cretcheu num note luar de sonho

M’ fazêbe serenata mas bnite

E m’conquistób

Mar levam pa terra longe

Mundo m’conchê e m’ fazel conchê nha pove

M’ ta ma bô na tud momento

Bô cantame bô dançame

Bô ê caboverdeano

Mim ê bô hino

Mim ê tristeza d’um cretcheu perdido

D’um sodade dorido

Sofrimento d’um partida

Alegria na regresso

Mim ê um amor profundo

Consolo pa tudo momento